Archivo de la categoría: CREACIÓN LITERARIA

LA POLA LLITERARIA

XVIII Mercáu Tradicional La Flor de L.lena
Sábadu 15 y Domingu 16 d’abril de 2023

Dende Vindonnus queremos convidavos a participar nes actividaes del XVIII Mercáu Tradicional La Flor de L.lena, el sábadu 15 y el domingu 16 d’abril. El programa inclúi una gran variedá d’actos pa tolos públicos. Vindonnus collabora entamando dos actividaes el domingu. Nesta xornada, col títulu La Pola lliteraria, vamos percorrer la vida y obres de delles figures venceyaes a la creación escrita en L.lena. Pela mañana vamos facer una ruta pelos llugares de Vital Aza, y pela tarde, un coloquiu participativu al rodiu d’otros autores de L.lena.

Domingu, 16 d’abril

11:30h RUTA CULTURAL ✍🏻🌸
La Pola lliteraria I: «Recorríu pelos llugares de Vital Aza»
Vital Aza (La Pola, 1851 – Madrid, 1912) ye probablemente l’autor ḷḷenizu más reconocíu. Estudió delineación en Xixón y, darréu, Medicina en Madrid, magar que se dedicase dafechu al periodismu satíricu y al teatru. Foi un autor de gran ésitu y bien popular gracies al so inxeniu y habilidá pa la poesía humorística y la comedia satírica, provocando simpatía ente’l gran públicu de la época. Vital Aza amás foi un autor prolíficu, con 63 obres escéniques esitoses ente teatru y zarzueles, amás d’otros munchos artículos en prensa y opúsculos poéticos.
Nesta ruta cultural y lliteraria averarémonos a la so trayectoria por dellos llugares emblemáticos como la casa natal, el bustu alzáu nel so honor nos xardinos de la Casa Conciyu o’l mesmu teatru de La Pola, yá que nel so ambigú amuésase una esposición compuesta por manuscritos, llibros, semeyes y oxetos personales del autor.
Cola asociación Vindonnus a la cabeza, la ruta va salir el domingu 16 d’abril dende l’horru La Caleya, a les 11:30h, siendo de llibre participación, apta pa tolos públicos y con una duración aproximada de 90 minutos. Amás van acompañanos como guíes Alberto Fernández y José Antonio Vega.

17:30h ESQUISA NEL HORRU 📚🌸
«La Pola lliteraria II: Autores de Ḷḷena»
Dando continuidá a la ruta cultural, el mesmu domingu 16 d’abril, yá n’horariu de tarde (a les 17:30h) y baxo l’horru, va facese una charra coloquiu sobre autores del conceyu. Ḷḷena ye cuna de dellos escritores notables: Francisco Bernaldo de Quirós y Benavides, Vital Aza, Daniel Nuevo Zarracina, Juan Menéndez Pidal, Manuel Pilares o José Manuel Castañón. Son delles personalidaes reconocíes pola so creación lliteraria en distintos xéneros (poesía, novela, teatru…), tanto n’asturianu como castellanu.
Nesti coloquiu, abiertu a la participación del públicu, vamos falar sobre estos autores y les sos obres, sobre otres figures menos recordaes y sobre’l panorama más recién.
Participen: Xulio Concepción Suárez, José Fernández ‘Trichuru’ y Alberto Fernández.
Modera: Asociación Vindonnus